PROKAL.CO, MUN inya sudah ngarannya mambantas coklat, Igup - ni lain ngaran banar, karangan panulis wara - paling katuju banar. Mun asa kada sibuk, kimut-kimut muntung Igup mambantas coklat. Makanya kada salah amun kakawalannya mamadahi, Igup bisa kada bahinak mun inya kada mambantas coklat sahari haja.
Nah harian itu kawal sakantur Igup tulak ka Jakarta. Kada kakawalannya di kantor nang lain, nang mamasan oleh-oleh baju atau sandal, si Igup cuma memesan coklat haja.
“Pokok unda tukarkan coklat nang nyaman wan bamirik lah wal,” kawal Igup basuara.
Barapa hari tulak ke Jakarta, kawalnya datang jua. Coklat pasanan Igup langsung haja dijulung. Kakaya kakanak halus talihat makanan, Igup pina arai banar.
Langsung haja dua kotak dijulung Igup dibawanya bukah ka ruangan nang dasar sudah disiapkannya. Maksud Igup inya mambantas coklat sangaja bakurung di ruangan supaya kada ada nang mainta.
“Dasar pamalar ikam Sud ai. Bantas haja sorangan situ coklat ikam lah,” kakawalannya nang handak marasai coklat tukaran di Jakarta manyumpah.
Parak dua jam haja Igup sudah kaluar tumatan ruangan bosnya, nang disiapkannya gasan bakurung mambantas coklat.
Babaya Igup kaluar ruangan, kakawalannya tanjal tatawaan. Hiran ai Igup malihat kakawalannya nang awalnya manyumpah, wayah ini malah manawakan inya.
“Makanya jangan mamalar coklat sorangan. Tu pang jadinya, habis am gigi hibak wan coklat. Nang kaya urang kada suah manyikat gigi baumuran haja,” sambat kawalnya mahuluti.
Mandangar nang kaya itu badadas ai Igup bakaca. Babaya diitihinya bujur-bujur, sekalinya giginya sudah hibak wan coklat nang balikit di sana sini.
“Ma ai, bapadah coklat bamirik wan larang harganya. Kada tahunya balikit ka gigi. Pantas haja tumatan tadi unda kada pati nyaman barasa di muntung, sekalinya coklatnya balikit di gigi unda,” jar Igup bamamai sorangannya. (rin/upi)